District chanchin

Lunglei District hi Mizoram chhimlama awm a ni a. Lunglei District chu heng district Siaha, Lawngtlai, Serchip leh Mamit District te hian Chhim-chhak lamah te, chhim thlang lamah te, hmar chhak lamah te leh hmar thlang lamah te an hual vel a ni. International Boundary pahnih a nei a, a awmna atanga khaw chhak lamah Myanmar nen a inri a, khawthlang lamah Bangladesh ram nen a inri bawk a ni.
Lunglei District hmar lama awm te chu, Mizoram laihawl velah a awm a, Manipur atanga National Highway 2 lo kalin Seling kaltlangin Serchhip a rawn kaltlang zel a, hemi kawng hian Mizoram State khawpui ber Aizawl chu a pawh a, a inkar hlat zawng hi 235 Km vel zet a ni. Tin, Thenzawl paltlang kawng World Bank Road pawh hian Lunglei atangin Aizawl a pawh a, 164 km vel chauhva hla a nit hung. He kawng hi Lunglei, Siaha leh Lawngtlai lam atang a Aizawl kal tur tan chuan kal khan berah hman a ni.

Division rorelna leh a huam chin te:

Lunglei khua hi, Mizoram khaw lian ber pahnihna a ni a, Mizoram chhim lamah chuan hmun laili takah a awm a ni. India topographic map No. 84B/09 leh 84B/13 in a tarlan danin Lunglei hi longitudes 92042’45” E to 92050’50” E leh latitudes 22048’18” N to 22056’55” N ah a awm. Lunglei khawpui zau zawng hi, chhim lamah Thaizawl, tin, hmar lamah Kawmzawl te, khawthlang lamah Hauruang leh Vanhne te leh hmar chhak lam deuhva Zobawk te nen teh chhuah vekin 55.08 sq.km zeta zau a ni.
Sub-Division pahnih leh R.D Block pathumah then a ni a:

Sub Division:

Lunglei Sub-Division
Tlabung Sub-Division

R.D Block:

Lunglei R.D Block : 1,117. 06 sq.km
Lungsen R.D Block : 1,046. 29 sq.km
Bunghmun R.D Block : 1,389. 26 sq.km
Area pumpui : 3,552. 61 sq.km

Sik leh Sa (Climate)

Mizoram sik leh sa te hi, a awmna hmuna, tlang sang tak tak te, ngaw te leh hmun ruam (valley) ten an siam nuam em em a, chutih lai chuan North-West India leh Bay of Bengal ten a ram sik leh sa leh ruah chungchangah te an tanpui ve bawk a ni. Tin, Chin Hills, Arakan Yoma Hill Tracts te leh Chittagong Hill Tracts te hian a ram sik leh sa siam chung changah pawimawhna thuk tak an nei bawk. Mizoram sik leh sa siamtu ber chu Tropical Monsoon Type, an tih hi a ni a, chung te avang chuan Lunglei District chuan sik leh sa nuam tawk tak a nei a, thlasik laiin a vawt lutuk lova, nipui laiin a lum lutuk bawk lova, fur ah ruahtui thahnem tak a dawng thei bawk a ni. Fur hun chhung hi a rei lutuk lova, June thla atangin fur ruah a intana, Septembet thla laihawl vel chuan a tawp leh mai a, chutiangin nipui hun leh thlasik hun chhung pawh thla hnih thla thum chhung vel chauh a ni thin. Ruah hi thlaiin a ngeih tawk vel chiah Lunglei district hian a dawng thin tlangpui a ni.

Ruahtui tlak dan (Rainfall)

Fur in tana ruah tam tham deuh hi My thla tawp lam a tanga in tanin, September thla vel atangin a tawp tan a. Kum tinin ruahtui tla hi 8. 53 mm velin a danglam thin tlangpui a ni.
Lunglei Khawpui chhung bikah chuan kum 32 chhunga ruahtui tlak an chhianchhiah dan chuan kum 2000 kum khan ruahtui a tla tam bera, khami kum chhung khan ruahtui hi 5554mm lai a tla ni a chhut a ni a,kum 2008 kum kha kum 32 chhunga ruahtui tlak tlem ber kum niin 1742.5mm a tam ruahtui a tla nia chhut a ni thung. A tlangpuiin Lunglei District hian ruahtui 3204.73mm kum tin dawng anga chhut a ni.

Lunglei District leilung chungchang (Geology of the District)

Lunglei District awmna hi, Mizoram chhim leh hmar lam atanga tehin hmun laili vel tak tropical huam chhunga awm a ni. Tropic of Cancer 230 N hian Mizoram khawpui Aizawl atanga 50 km hla Hmuifang tantlangin Serchhip District khaw pakhat Lungkawlh a paltlang chho a ni. Tunhma Hnahthial District pian hma chuan Lunglei District leh Serchhip District inrina lai a ni, Lungkawlh khua hi. A ram leilung hi Sedimentary, Surma group huam chhunga mi niin, leilung langsar zual te chu, Silstone, Limstone, Sandstone te leh lei inchawhpawlh tak tak te an ni hlawm bawk a ni.

Lunglei District leilung Mualmut (Topography of Lunglei District)

Lunglei District ram mualmut hi a in ang lo viau hlawm a, district khawchhak lam leh hma tlang lam ram chu tlang hriam deuh leh sang tak te an nih laiin, district khawthlang lam leh chhim thlang lam chu, phai ruam deuh leh tlangdung lian, hniam rai deuh an nit hung. A tlangpuia sawi chuan he ditrict ram leilung mualmut hi tlang sang leh phai ruam hmun te tiin a sawi theih mai awm e.

Khawthlang lamah chuan Bangladesh a ri a, chulai hmun chu hmun hniam tlang lian vaklo awihtlan te te te an ni hlawm. Khawthlang lam district riamri ah chuan Sazuklui a luang a chu chuan Khawthlang Tuipui (Karnaphuly) a zu fin a ni. He Sazuk lui hian district hmar thlang lam Saisen khaw bulah hnar a nei a, chhim zawnga 50 km zet a luan hnuah Khawthlang Tuipui a zu fin ta ani. District chhim thlang lam ramri chanve zet ah chuan ramri lui lian tak pahnih Tuichawng Lui leh Khawthlangtupui a awm a. Tuichawng Lui chu Chawngte khua atanga lo luangin 25 km zet chhim thlang lam ramriah a luang a, Chutiangin Khawthlangtuipui pawh ramriah luangin district ramri atan 34 km zet a luang bawk a ni .

District khawthlang lam pang leh chhim thlang lamah chuan tlangdung lian leh sei pui pui a inkhawh thlur sung hlawm a. Chung tlangdung te chu awihtlan leh ruam hniam deuh tein an kul phun hlawm a ni. Chung tlangdung chuan pianze hrang hrang neiin a then te chu tlang bawk lian vak lo te an nih laiin, chulai hmuah chuan ruam, phairai zawl leh lui kuam rai zau deuh tein a pharh thla bawk. Puankhai tlangdung hmingthang tak, 15 km vel zeta sei leh lian deuh mai hmar lam hawi zawnga inkhawh zurah chuan Chawilung, Hmunthar leh Zohmun khua te an awm hlawm a, chu tlangdung inkhawh zur chu Khawthlantuipui ruamah a inkhawh thla a ni.

Puankhai Tlangdung chhak lamah chuan Tuilianpui emaw Sazai Lui tia an sawi chu Mamit District Mar South khua atangin district ramri lui a rawn luang a. Sazai Lui khawchhak lam, Thorang hmar lam si ah chuan Kau Lui a lo luang thla ve leh bawk a. Kau lui siamtu tlangdung chu hmar hawi zawnga inkhawh zelin chutah chuan Tleu khua te, Kawnpui leh Darngawn khua te an awm hlawm a ni. Tichuan Mamit atang chuan District ramri turin Mar lui a lo luang thla ve bawk.

Chhimtuipui, Mizoram chhung pawha Lui lian leh pawimawh tak mai chu Myanmar ram atanga lo luangin hmarthlang lam hawi zawngin a luang a, Ditrict chhungah hian 77 km zet a thui a luang a ni.