Hmun pawimawh

Khawnglung Wildllife Sanctuary

Khawnglung hi tlang a ni a, Aizawl leh Lunglei inkar Pangzawl khaw bul Aizawl atanga 160km a awm a ni. A tlang chip ah hian he tlang hming chawi hian Khawnglung khua a awm a, helai hmun hi tunhmaa khua in runna zinga rapthlak tak kum za bi 19na laihawl lai vela Sailo lalte inkara thil thlenna hmun kha a ni a. He thil thleng nena in zawm thil pakhat awm chu mizo hmangaihna thawnthu a kan lo hril thin Chalkunga leh Thanghniangi te inhmangaihna, nula hmeltha tak mai ral in khua an runna a sala an man chanchin kha a ni. Chalkunga hian ral hlauhawm tak kut ata chu nun thapin a hmangaih em em chu va chhanchhuak ina hnu ah va chhanchhuak in, vanduaithlak takin an haw kawngah Tiau lui an kanna ah tui luang chak tak mai chuan a Di Thanghniangi chu a la ta daih mai a, theihtawp chhuaha a bei chung pawn a chhan hman ta lo a ni.

A tlang pang sir tin hi kham sang tak tak niin, ramsa hleuhawm leh ral laka invenna tha tak a ni a. Kum 2000 khan Ramsa humhalhna hmun ‘Wildlife Sanctuary’ ah puan a lo ni tawh a, Khawnglung ram zau zawng hi 35 sq.km a ni a, tih helai hmun hi ramsa leh sava bakah thing leh mau leh pangpar ah a hausa hle bawk a ni. A hmun thleng tur hian 10km vel chu ke a kal a ngai a ni.

Helai hmun tlawhna hun atan duhawm ber chu October leh March thla inkar a ni a, tlawh tur hian Department of Environment and Forest, Mizoram biain, anni phalna hian a tlawh theih a ni.

Khawnglung Wildllife Sanctuary

Lung Milem

Tawikhawthlir tlang dung hmar tawp lam Mualcheng khaw bulah lung lian tak tak awmna hmun a awm a, helai hmunah hian mihring lem ni awm tak pathum urhsun taka inngaihtuah (meditational poses) lem Buddhists mi ang tak, helai ram mite chuan ‘Lung Milem’ (Stone Figures) an tih chu a awm a ni. He thil hi tu siam leh tu ker nge tih tun thleng hian hriat a la ni lo a, tin hetiang ang hi Mizoram hmun dangah hian hmuh tur a awm miah lo a ni. Hri hi thil mak ve tak chu a ni. Helai hmun hi Lunglei atanga kalin 65km vela hla a ni.

Lung Milem, Mualcheng South

Darkhuang Tlang – Pukpui

“Darkhuang Tlang”, “Gong Mountain” tia koh bawk chu Pukpui khua, Lunglei atanga 7km vela awm a ni a. Helai hmun hi Pathian thu hriltu Darphawkan Pathian a biakna “thlarau thianghlim nena an inpawlna” hmun a ni a, hmalam hun a thil lo thleng tur te hrilhlawkna te dawngin Missionary te lo kal tur thu pawh hi hre lawk in, “Tuipui ral atangin Sap Mi ngo an lo kal anga, an thu rawn ken te in lo zawm tur a ni” tiin. Hei hi Mizo ten Kristianna kan hmelhriat hma lawk kum a thil thleng a ni. He tlang chhipah hian a duh apiang tana tawngtai theihna turin Tawngtaina In sak a ni bawk.

Kristian Hmasate Thlanmual – Theiriat

“Kristian Hmasate Thlanmual” hi Theiriat khua Lunglei bulah a awm a. Pioneer Missionary Rev. R.A. Lorrain leh F.W. Savidge ten lunglei an lo thlen hma hian Sehan Roy, Khasi Officer Aizawl-Lunglei inkar kawng siamna hna thawh enkawltu hian mizo hnathawkte hnen ah pathian thu hrilhin Chhungkaw 40 vel chu kum 1900 khan Kristian an lo ni tawh a. Heng ring tharte hian thlan tur dang nei lovin Theiriatah hian Kristian awmna khua an lo din ta a. Hun a kal zel a, Missionary te an lo thlen tak ah chuan an han bel nghal ta chawt mai a, anni ringtu hmasa te hi zirna mumal dawng hmasa tu te an ni ta a. an thlan lung hi Theiriatah hian phun niin an thlan lungah hian Pathian thu leh thu ziak mawi tak Sap tawnga ziah a ni nghe nghe.

Thangliana Lung – Tlabung

Bangradesh Ramri bul Lunglei atanga khaw thlang lam 98km ah Tlabung khua ah hian, Captain T. H. Lewin British Pioneer huaisen tak mizo ten Thangliana tia kan koh “Man of Great Fame” a hriatrengna lung phun a ni a. Lewin hi Chittagong Hill Tracts Deputy Commissioner a ni a, Mizoram ah kum 1865 khan Tlabung atangin a lo lut a ni. Lwein-a hian Rothangpuia Thangluah hnam Lal nen inremna lehkha ziakin a thuthmun hi Rangamati atangin Tlabungah a in sawn nghe nhge a ni. Mizo lal engemawzat nena inhmelhriat in mizo te mi ngo thian hmasa ber tia hriat a ni bawk. mizo te chanchin hi ziakin lehkha bu a siam nghe nghe bawk a ni. Tlabunga a awm lai hian mizo nula Darpuii nen innei in fapa duhawm tak a n nei a, mahse vanduai thlak takin kumkhat hnu ah an fapa chu a boral a ni. Lwein-a hi a hna atanga a chawlh hhnu hian Darpuii hian England-a a ruala let chu a duh ta lo a. Lewin-a hi kum 1916 khan kum 77 mi niin a boral ta a ni. amah hriat renga lung hi a sap nupui Margaret Lewin hriatpuina leh remtihna in kum 1920 khan phun a ni ta a ni.

Bungalow of Pioneer Missionaries

Kum 1903 khan Serkawn, Lungleiah Rev. J.H. Lorrain , Rev. R.A. lorrain-a u leh Rev. F.W. Savidge, mizo ten Pu Buanga leh Sap Upa tia kan koh te chuan Chawlh Buk (Bungalows) pahnih an sa a. Heng in pahnih hi Mizorama Building ber an ni hial awm e. Heng Pioneer Missionary te hi Welsh ram atanga lo kal in Mizoram lei hi kum 1984 ah an rawn rap a, Presbyterian Mission Church hi Aizawlah an din a, mizo hnam kalphung leh tawng te zirin an ngaipawimawh em em a, mizo thumal te buatsaihin Roman Script hmangin an siam a, Mizo-English Dictionary te an siam a, Bible leh Pathian fakna hla te mizo tawngin an let bawk a ni. hemi hnu hian an ram lamah let leh in, kum 1897 ah lo let leh in Baptist Missionary Society hnuaia thawkin Mizoram chhim lamah Serkawn, Lunglei ah an awmhmun an rawn bengbel ta a ni.

: BCM Bangalow No. 1 Pu Buanga (JH Lorrain) Now Reserved for BCM General Secretary

: BCM Bangalow No. 2 Sap Upa (FW Savidge) Now Reserved for BCM AGS i.c Mission

Phunhnawma Lungpui – Lungpui Tlang

“Phunhnawma Lungpui” hi lungpuitlang khua a awm a ni a, Lunglei atanga khaw chhak lam 106km a awm a ni a, Myanmar ramri hnaih lam a awm a ni. Lung lian tak a sei zawng hi 60 metres niin a san zawng hi 26.60 metres a ni bawk. Tlang chip thengthaw nuam tak ah a awm a, a tlang hi feet 5058 altitude vela sang a ni. Phunhnawma Lungpui hi khaw thlir nan a rem em em a, a chhehvel ram leh tlang te thlirna hmun nuam tak a ni a, helai hmun atang hian Myanmar khaw thlang lam tlang dung pawh a hmuh theih a ni. Hranghlui ten an sawi dan chuan Phunhnawma Cheural khaw lal hian a ram vahna lamah he lungpui lian tak hi a hmu chhuak a ni awm e. Helai hmun a kal hmasak be chuan Lasi nen in tawngin anni chuan khua a let leh a arpa ken sak turin an ti a, arpa a ken sak chuan ramsa a duh duh a kah theih nan mal an sawm dawn a ni tih an hrilh a. An sawi ang chuan tiin Lasi te pawh chuan an thutiam chu hlenin mal an sawm a, ramsa tam tak that in pasaltha nihna hial a hlawh chuah phah a ni.

Ui Lung – Ngharchhip

He Lung phun mak danglam taka ker hi Ngharchhip khawl bul, Myanmar ram ri hnaih lama awm a ni a. Lunglei atanga khaw chhak lam a awm a ni. He lungphun mak danglam tak hi kum 1800 vel a Chinzah lal leh a mi te ker leh phun niin, ram buai avanga an khua then darh an nih a an khua Dawn atang pem ta te hriat reng nana an siam a ni. He lung hi feet riat leh a chanve a sang niin. a len zawng hi feet sawmpakhat a ni a, he lung ah hian milem danglam tak tak ran lu lem te leh mihring lem, feileh hriamhrei chi hrang hrang kenglai lem te ker a ni. Chinzah lal te hi Halkha hnam Myanmar ram ami an ni a, Dawn ah hian an in bengbel a ni. Kum 1700 chho vel laia ram buai avangin an khua hi sawn a ni a, an awmna hmun atanga pem chhuak in Ngharchhip khua Mizoramah awm ta in, he lung hi an phun a ni.

Lungding – Rualalung

Lungding hi Rualalung khaw bula awm a ni a, lunglei atanga chhim lam (1km a hla a awm a ni. Lungdai khua hi sawi dan chuan an khua hi lung tamna leh lei sakhal tak tak awmna hmun a ni a. He lung hi 69ft vela sang a ni a bul hi the kualin 120ft vela lian niin a chip hi 20ft bial a lian a ni bawk. A pang vela hnim zam chi in a bawk nasat avangin a chip a lawn hi a harsa lem lo a ni. Tun hma chuan he lung hi Mizo te hian an be thin ni a sawi a ni. Helai bulhnai a thilg leh mau leh lung an nih tur ang ni lova pian phung mak danglam deuha a awm chuan ramhuai/thlarau thil tih niin an ngai a, a bul pui ber pawh he Lungding hi a nih an ring bawk a ni. He lung pang hi hnimin a bawh khah vek pawhin a chip hi chu a fai han zel niin an sawi a, helai a fai bel han na chhan hi chhui chhuah tumin ram pasaltha ten eng thil vang nge ni ang tih hriat chhuah tumin an chang thin a, mahse engmah hmuh tur a awm lo. Hun a lo kal zel a, Mizorama chanchin tha a lo thlen a mizo te Kristian an lo nih hnu ah chuan helai hmun ah hian khaw mi thenkhat te tawngtaiin ramhuai hna thawh a bo theih nan te an tawngtai a, chumi hnu atang chuan a chip ah pawh hian thali leh hnim te a lo to ve ta a ni an ti.