Lunglei, 2025 Vawkhniahzawn thla ni 3: Vawiin khan ‘District khat, thar chhuah chi khat’ (One District One Product) hnuaia Lunglei District ODOP thei, ‘balhla’ thar chhuah leh sawngbawl dan zir hona, ‘Training on Post Harvest Management & Value Addition of Banana (ODOP)’ chu Lunglei District Horticulture Office leh ATMA (Agricultural Technology Management Agency) te ṭang kawp huaihawtin Lunglei DHO Conference Hall-ah buatsaih a ni.
He zir hona hi hun hnihah ṭhen niin, hun khatna chu Lunglei District Horticulture Officer (DHO) Pu Lalṭhakima chuan a kaihruai a. ATMA Lunglei Block Technology Manager Pi Zonuntluangi Pachuau chuan hmun dang aṭanga lak luh ngai lo va, Lunglei District aṭanga thil thar chhuah leh siam chhuah intodelh tura ṭan la turin balhla chingtu leh balhla aṭanga thil siam chhuaktute a fuih a. ODOP hnuaia Lunglei District chhunga balhla thar chhuah leh balhla aṭanga thil siam chhuah tipung tura sawrkar hma lakna chu a hlawhtlin theih nan tihtak zeta bei turin a chah bawk.
Krishi Vigyan Kendra (KVK) Lungleia Subject Matter Specialist (Home Science) Pi Zonunkimi Ralte chuan tui zawk leh a hmel lan dan pawh mipuite tana itawm leh lei manhla zawka balhla aṭanga ei tur siam chhuah dan tur a lem (powerpoint presentation) nen tar langin a zirtir a. Lunglei District Commerce & Industries Office (DCIO) aṭangin sawrkar laipui ruahmanna pawimawh tak – PMEGP (Prime Minister’s Employment Generation Programme) leh PMFME (Pradhan Mantri Formalisation of Micro Food Processing Enterprises) kal tlanga sumdawngte tana bul ṭanna leh an sumdawnna tihchangtlun zel nana sum puk (loan lak) theih dan ngaihthlak a ni bawk.
Hun hnihnaah a taka tihchhinna hun hman a ni a. Kal khawmte chu balhla kamram (chips) siam dan a taka zirtir niin, anmahni pawhin a takin an ti ve chhin nghal zel bawk a. Lunglei District Horticulture Consultant Pi Liansangpuii Pachuau chuan lawm thu sawiin hun a khar a ni.
